حملة أبو فلان المغنواتى للبحث عن رئيس البلاد
سلسلة أبو فلان وحقوق الإنسان
العدد رقم(14 )
أهل الكفر والنجع المسالمين
دعونى ابلغكم بما نما لعلمى حول ما أذيع مؤخراً عن اختيار رئيس للجمهورية ، أنتم تعرفون جميعاً أن السيد المنتظر سوف يأتى مجبراً تحت حكم العسكر ودون صلاحيات واضحة بمهامه " يعنى هيركب على الكرسى ومش عارف رايح فين" وسوف يحدد له كل شئ بداية من إقامته ونهاية بزياراته وتوقيعاته السادة الجنرالات كى يدير مصالح الدولة التى لا تعبر عن مصالحنا نحن المنتجين فى إرجاء المحروسة ، لذا قررت أن أرسل لكم هذه الرسالة كى لا تجعلوا أحد يخدعكم بالكلمات الرنانة العامة حول النهضة والشرف أو النضالات البائسة أو خدمته وخبرته كعبد بنظام الغش والاستبداد ، فلا تنتخبوا رئيس لبلادنا إلا اذا توافرت فيه الشروط الدنيا لأى حاكم شريف وهى باختصار شديد :
- عايزين رئيس مصرى ( مصرى الانحياز مش الجنسية وبس،) ليس تابعاً لحكومات عربية أو غربية أو إسلامية ، ولا يصدر الغاز والبترول والكهرباء والأسمدة والاسمنت لدول أخرى بسعر أقل مما يباع به فى بلادنا أو يبيع أرضنا لأمراء عرب بدون ثمن ، ويهدر إمكانياتنا الصناعية والزراعية لصالح حكومات وشركات دولية كبرى على حساب مصالح شعبنا المنتج .
- عايزين رئيس أيديه شريفة مش طايلة ومتوسخة بسرقة جيوب وعرق المصريين الغلابة .
- عايزين رئيس يرعى مصالح شعبه ويختار اللى فى صالح الأغلبية من المنتجين مش يختار صف الحرامية والتجار بدعوى القومية والوطنية والنهضة والكرامة .
- عايزين رئيس ميفرقش بين الشعب بدعوى حماية الوحدة الوطنية أو قيم الرجولة الزائفة ، ويفهم إن المرأة زى الراجل ليها كل الحقوق ، مش مخلوق ضعيف من ضلع أعوج ، رئيس يعرف قيمة المساواة اللى خلقنا بيها ربنا بصرف النظر عن الجنس أو اللون أو العقيدة .
- عايزين رئيس عنده رؤية بجد لنهضة وتطوير قدرات وإمكانيات بلد يعيش أغلبه على وجبة واحدة فى اليوم ،ويعانى ربعه من البطالة مقنعة وحقيقية ولا يعرف حوالى ثلثه القراءة والكتابة.
- عايزين رئيس يوزع الاراضى الزراعية على صغار الفلاحين وشباب الخريجين بحق الانتفاع بدون ما يتاجر اللصوص أتباعه فى دم الغلابة ، وكمان يوفر مستلزمات الانتاج ويدعم حقوقهم فى الإقراض والتسويق والزراعة الآمنة .
- عايزين رئيس يوفر سكن ادمي لكل مصرى بالمدن الجديدة اللى سيبنيها على الاراضى الصحراوية بثرواتنا من عائد قناة السويس وتصدير المواد الخام والجمارك والضرائب وعائد الصناديق الخاصة (قائمة الدخل كبيرة ) وكمان ميتصورش فى يوم أنه يكفل هذه الحقوق من جيبه الخاص( المنحة يا ريس).
- عايزين رئيس يفتح المصانع اللى اتقفلت ويطورها علشان تنتج العدد والآلات ، ويعم الخير اللى بجد على بلادنا ، ونوفر أكلنا بأيدينا ونوفر شغل لولادنا .
- عايزين رئيس يبطل يبص للمواطنين هو وحكومته على انهم سوق وتجارة ويعرف أنه موظف أختير مننا علشان يدير مصالح الشعب اللى أغلبيته ويمكن أكثر من 80% منه عمال وفلاحين وصيادين وصنايعية وموظفين صغار وناس على باب الله اسمهم ارزقية "مهمشين يعنى ".
- عايزين رئيس يتكسف من نفسه ومن مساند كرسيه ، لما كرامة مصرى واحد تتهان جوه بلدنا أو بره حدودنا ، ويحس بأن اهانة أى مصرى هى اهانة لبيته وعياله وأهله.
- عايزين رئيس يداوى الجروح والالم المرضى فيعمل مستشفيات بجد وتأمين صحى بجد يعالج الامراض اللى بجد أكلت صحة المصريين .
- عايزين رئيس يلم العصابة ويحاكمها مش يهاود معاها ويطلعها على المعاش الامن أو الخروج العادل علشان اتباعهم يكملوا مص دمائنا وتعذيب أهالينا ويستغلوا عمالنا وفلاحينا وحرفينا وموظفينا والغلابة اللى عايشين باليومية .
- عايزين رئيس يفهم أن بطاقته الشخصية وبطاقتنا الشخصية تدينا الحق أن أحنا نحاكمه لانه ( واحد زينا) ويبقى مؤمن بأن لينا حق فى ثروات بلادنا وفى انتاجها وفى دخلها مش يوزع على محاسيبه الغلة بدعوى أنا وابن عمى (صاحب الأموال والمصانع والاراضى )على الغريب (اللى هو احنا الشعب المنتج اللى على باب الله ).
- عايزين رئيس يعلم ولادنا بجد علشان يطلعوا علماء وعباقرة وأدباء ومثقفين ومهندسين ودكاترة وزراع وصناع ومنتجين، يقدموا منفعة لنفسهم ووطنهم .مش رئيس يفتح مدارس تدريب مهنى علشان يأهلنا للعمل عند اللى بيدير لهم البلد .
- عايزين رئيس يحلم زينا بأن أمن بلدنا وأستقرارها مش بالطوارئ والتعذيب والمخابرات والامن الوطنى والقومى لكن بتوفير عمل لائق وسكن أدمى ولقمة نظيفة تكفينا احنا وعيالنا ، من شغلانه شريفة متاحة للجميع مش لقرايبه والشلة والمحاسيب .
- عايزين رئيس يبقى متأكد أنه لو مطبقش برنامج بديل للغش والاستغلال والقهر والتلصص هنهد فوق دماغه العرش والقصر ، والبرنامج البديل يقوم على حلول عاجلة لدفع الفواتير المؤجلة لحل أزمات العلاج والسكن والتعليم والزراعة والدخل والطرق والمرور والكهرباء والغاز والمياه والصرف الصحى والثقافة والإعلام ، برنامج شامل يعنى برؤية منحازة للاغلبية المنتجة فى بلدنا لتطوير قدرات وامكانيات وكفالة حقوق المصريين (حزمة واحدة يعنى).
- عايزين رئيس يحاكم قتلة الشهداء والمجرمين اللى سرقوا عرقنا وتعبنا وشقانا ويعيد أموالنا المنهوبة من العصابة وأتباعها ، رئيس يحاكم الصف الثانى بأجهزة الدولة التى تدير الفساد، ويعدل بين الناس بتطبيق قيم الإنصاف علشان المحرومين والضحايا يقدروا يعيشوا مرة ثانية كبشر لهم كرامة ودخل وحياة أمنة .
- عايزين رئيس مؤمن بحق الناس بتنظيم نفسها دون وصاية من أحد ومؤمن بحقها فى الإضراب والتظاهر والاعتصام والعقيدة والرأى ومينحازش لحرية الأغنياء وأصحاب رؤوس الأموال والغرف التجارية بس ، ويعمل وزارات وأجهزة ملهاش معنى غير مراقبة عمل النقابات والجمعيات والروابط والتجسس على النشاط والناس ، رئيس يتيح لكل مجموعة عايزة تعمل خدمة عامة كل الحرية والدعم والمساندة .
- عايزين رئيس يرفع الحد الادني لأجور العاملين بالقطاع العام والخاص الرسمى والغير رسمى لـ1500 جنيه فى الشهر من غير ما ينكسف من أصحاب المال والسلطة والشركات والعز ، ويوقف الرشوة والسرقة اللى بتم عينى عينك فى معظم الهيئات والمصالح الحكومية ، رئيس يوقف نهب مليارات الغلابة باسم أجور المستشارين أو فلوس صناديق الخاصة ، رئيس يرجع فلوس المعاشات والتأمينات المنهوبة ويرفع الحد الأدنى للمعاش لألف جنيه علشان ديه فلوس المصريين المنتجين مش ريع العزبة اللى بيديرها .
يا أهل الكفر والحى الطيبين لو فيه رئيس بجد مترشح هيعمل كل ده انتخبوه ...ولا مفيش متقلقوش لأننا عرفنا السكة ومحدش يقدر يبنى سجون تانى على حريتنا .
وعموماً إحنا انتظرنا قرونًا علشان الرؤساء والحكومات واللصوص يفهموا الدرس ولو لسه مفهموش فحملة ابو فلان المغنواتى هتفضل مستمرة لحد ميقول أى رئيس هيجى زى بن على بتاع تونس " خلاص فهمت
الخميس ديسمبر 12, 2013 6:02 pm من طرف 
